Isi Prasasti
1. namaççiwāya oṃ mahājana di sahiṅālas partapān tuha ṅuḍa laki wini maṇḍaṅar wuat tānta parāwis, dharma-
2. gatiṇḍa ḍang karayān partapān ratnamaheçwara siḍa busu plār namāṇḍa ḍang karayān lāki busu iti namaṇḍa ḍang karayān wini
3. atyanta dharmastha siḍa ḍuaḥ ayāṇḍang karayān lāki parpuanta jantakabbi namaṇḍa ayaṇḍa ḍang karayān wini parpuanta panuaḥhan nama-
4. ṇḍa siḍa inan=ḍua adhirākṣa siḍa waranak putra maratna waranak strīratna aḍiṇḍa ḍang karayān laki busu tarbba namaṇḍa iparḍa ḍang karayā-
5. n=parttapān busu bajra busūttara udaṇḍa sānak busu taray busu daṇḍay udaṇḍa sapopo busu huwuriyan pamaṇḍa wiṣṇurata namaṇḍa sarabhāra di
6. nāyaka watak=bunut tathāpi udaṇḍa sapopo busu padaraṅan=nāmaṇḍa surabhāra di nāyaka watak = kahuluan tathāpi waranak siḍa busu putiḥ paḍi, taijaḥ
7. pahik swasta pagarwwassi awat iṇḍu anakḍa kulaputrī inan=parāwis tathāpi pagarwwatu pagarduri siwahasambuḥ si buha sampuh … witaka dadang wiṇaraḥ rari inan=sabaña
kña anakḍa ḍang karayān partapān puṇya prabhāvāṇḍa ḍang karayān partapān kathamapi sukha subhikṣa yang rājya dirakṣa iya sabañakña yang deça itas=tataḥ
8. pūrwwa dakṣiṇa paççima uttara itas=tataḥ iya mangstuti guṇāṇḍa ḍang karayān partapān. tathāpi āda ācāryyaṇḍa dhalawa namaṇḍa sthāpaka sida tathāpi
9. bapuh=muṇḍa dang karayān çiwārjita nāmāṇḍa nāyaka di prang kapulang siḍa inanpa=rawis siḍa ta sahāyāṇḍa ḍi dharmma puṇya kuçala. iya makajādi pra-
10. tiṣṭa di hyang haji tarkalaut=sang hyang wintang prasāda suprayukta kṣair sahita iya mātraña winiḥnya kṣetra di tanaḥ buṅa tlu bariḥ pragāluḥ ampa lattir
11. pamaṇḍyan tlu lattir tina ayun ampa lattir wunu tlu lattir pawijaḥhan ḍua lattir kaywara mandir dua lattir waṅur waharu salattir muṇḍu
12. ḍua lattir kakalyan salattir tarukān salattir, mātrāña winiḥ ḍi tanaḥ buṅa parāwis ampa puluḥ salattir parttakan di walunuḥ pu posuḥ
13. di pragāluh parpuanta warpatiḥ manulu namaṇḍa naiyaka di kyubuṅan sahāyāṇḍa warpatik pu līhasin namaṇḍa nāyaka di mantyāsiḥ
14. ḍapunta marhyang jñanatatva namaṇḍa
